निकासी कर घटाउनुपर्ने मागपत्रसहित प्रधानमन्त्रीलाई भेनियर ब्यवसायीद्वारा ध्यानाकर्षण

मेचीनगर । नेपाल भेनियर उत्पादक संघले ब्यवसायिक हितका ३ बुदे ध्यानाकर्षणसहितको माग पत्र प्रधानमन्त्री पुष्पकमल दाहाललाई बुझाएको छ । संघले भेनियर उद्योगबाट उत्पादित कोर भेनियर (भेनियर पाता) भारत निकासी कर ६ रुपैयाँ तिर्दै आएकोमा प्रतिकिलो ३ रुपैयाँ लागु गर्न मागसहितको ध्यानाकर्षण पत्र बुझाएको हो ।

झापाका प्रमुख जिल्ला अधिकारीमार्फत प्रधानमन्त्री कार्यालयलाई ध्यानाकर्षण पत्र बुझाएको मंगलबार मेची उद्योग वाणिज्य संघमा पत्रकार सम्मेलनमा जानकारी गराएको छ ।

भेनियर उत्पादकबाट भारत निकासी गर्दा  प्रतीकिलो २० रुपैयाँ कर लगाउन  भनी प्लाईउड उद्योगले  सरकारमा गरेको डेलिगेशनप्रती चिन्ता व्यक्त गरेका थिए ।नेपाल भेनियर उत्पादक संघका अध्यक्ष दिपक पाण्डेले भेनियर पाता भारत निकासी  गर्दा प्लाईउड र भेनियरलाई विभेद गरेको बताए । उनले उद्योगले उत्पादन गरेका कच्चा पदार्थ भारत निकासी गर्दा निशुल्क दिने, ६ प्रतिशत अनुदान पनि दिने सरकारले भेनियर उत्पादकको त्यहीँ वस्तु निकासी गर्दा प्रतिकिलो ६ रुपैयाँ कर लिने सरकारको बिभेदपुर्ण नीति भएको बताए ।

आर्थिक मन्दीले झापाको ४ वटा भेनियर उद्योग पलायन भएको उल्लेख गर्दै अध्यक्ष पाण्डेले भने, `यो अवस्थामा सरकारले सुबिधा दिएर ब्यवसायीलाई प्रोत्साहन गर्नुपर्नेमा निकासी कर बढाउने कुराले सबै ब्यवसायीहरु चिन्तित छन् ।´

पहाड क्षेत्रबाट नेपालमा कम प्रयोग आएको उत्तिस, मलातो, मौवा, कदम, पिठारी लगायतका छिट्टै सढेर जाने कमसल प्रजातिका काठहरुलाई कच्चा पदार्थका रुपमा प्रशोधन गरेर भेनियर पाता भारत निकासी गर्दै आएको छ ।

भेनियरवलाले उत्पादन गरेको प्रशोधित पाता प्लाइउड उद्योगले २० प्रतिशत मात्रै लिने गरेको र अन्य ८० प्रतिशत भारत निकासी गर्दै आएको, भारतीय रकम नेपाल भित्र्याएको, सरकारलाई राजस्व तिर्दै रोजगारी सृजना गरेकाले भेनियर उत्पादकलाई प्रोत्साहन गर्नुपर्ने अध्यक्ष पाण्डेले भनाई थियो ।

उत्पादनको परिणामअनुसार पाता बिक्री नहुँदा भेनियर उद्योगहरु संकटमा पर्दैआएको नेपाल उद्योग बाणिज्य महासंघका केन्द्रीय सदस्य नरेन्द्रकुमार खड्काले बताए ।

उनले राज्य र प्लाईउड उद्योगका कारण भेनियन उद्यागीहरु मरमा परेको दावी गरे । उनका अनुसार यो विभेदपूर्ण राज्यको नीति सच्याउनुपर्छ ।

भारत निकासी गर्दा दैनिक २ करोडको कारोवार रकम भित्र्याउदै आएको र राज्यलाई त्यति रकमको कारोवार हुँदा ४५ लाख रुपैयाँ कर तिरिरहेको अध्यक्ष पाण्डेको भनाई छ ।

८० हजारबढी मजदुरले रोजगारी गर्दैआएको वरिष्ठ उपाध्यक्ष श्याम न्यौपानेले बताए । 

यस्तो छ अवस्था:

भेनियर उत्पादकले उत्पादन गरेको पाता प्लाईउड उधोगले लिने गर्थे। तर, पछिल्लो समयमा प्लाईउड उधोग आफैले पाता उत्पादन गरेपछि देशभर संचालित भेनियर उत्पादकहरु संकटमा परेका हुन् ।

संकटमा परेका भेनियर उत्पादकहरुले बैकल्पिक माध्यम भारतका प्लाईउड उद्योगसँग समन्वय गरेर उत्पादित पाता निकासी गर्दै आएका छन् । त्यसरी निकासी गर्दा सुरुसुरुमा कर छुट नै थियो । २०७१ सालमा खिलराज रेग्मीको सरकार पालामा निकासीमा प्रतीकोलो ३ रुपैयाँ लागू गरेको थियो ।

त्यो बेला ५० पैसा मात्रै लागू हुनुपर्ने भन्दै ब्यवसायीहरु पटकपटक मागसहित आन्दोलित भएका थिए ।नेपालमा १५० वटा भेनियर उद्योग सञ्चालनमा छन् ।

अहिले अधिकांश प्लाईउड उद्योगहरुले आफै भेनियर पाता उत्पादन गर्न थालेपछि भेनियर ब्यवसायीले उत्पादन गरेको पाता खरिद २० प्रतिशत मात्रै गर्दै आएको भेनियर ब्यवसायीको आरोप छ । 

उत्पादन गरेका भेनियर पाता नेपालमा बिक्री हुन छाडेपछि भारत निकासी गर्न बाध्य भएको उनिहरुको तर्क छ ।