झापा । स्वास्थ्य बीमा बोर्डले आजदेखि झापाका बिएण्सी मेडिकल कलेज शिक्षण अस्पताल झापासहित १० वटा निजी मेडिकल कलेजमा स्वास्थ्य बीमा कार्यक्रम लागू गरेको छ ।
देशभरका सरकारी अस्पतालमा मात्रै लागू गर्दै आएको बोर्डले यो पटक २ वटा आँखा अस्पताल र १० वटा मेडिकल कलेजलाई बीमा कार्यक्रम सञ्चालन स्वीकृति दिएको हो ।
विर्ताज्योति आइकेयर प्रालि, झापा र दृष्टि आई अस्पताल, पोखरामा पनि स्वास्थ्य बीमा लागू भएको छ ।
साउन १ गतेदेखि स्वीकृति लिइएका अस्पतालले स्वास्थ्य बीमा कार्यक्रम सुरु गर्दैछन् ।
बोर्डका अध्यक्ष डा. गुणराज लोहनीका अनुसार काठमाडौं उपत्यकाका चार र बाहिरका ६ वटा मेडिकल कलेजमा स्वास्थ्य बीमा कार्यक्रम स्वीकृति दिइएको हो ।
बोर्डका अनुसार हालसम्म ४७२ वटा सेवा प्रदाय स्वास्थ्य संस्थासँग बीमा कार्यक्रम सम्झौता भएको छ ।
बीमा कार्यक्रममा सूचीकृत भएका अस्पतालहरूमा काठमाडौं मेडिकल कलेज टिचिङ हस्पिटल (केएमसी अस्पताल) सिनामंगल काठमाडौँ, मनमोहन मेडिकल कलेज शिक्षण अस्पताल, सितापाइला, नेपाल मेडिकल कलेज शिक्षण अस्पताल, जोरपाटी र किष्ट मेडिकल कलेज टिचिङ हस्पिटल ग्वार्को छन् ।
यस्तै स्वास्थ्य बीमा कार्यक्रमका लागि सूचीकृत भएका उपत्यका बाहिरका मेडिकल कलेजहरूमा बीएण्डसी मेडिकल कलेज शिक्षण अस्पताल झापा, नोबेल मेडिकल कलेज टिचिङ हस्पिटल विराटनगर, विराट मेडिकल कलेज शिक्षण अस्पताल विराटनगर, चितवन मेडिकल कलेज शिक्षण अस्पताल भरतपुर, देवदह मेडिकल कलेज खैरनी रूपन्देही र नेपालगञ्ज मेडिकल कलेज बाँके रहेका छन् ।
निजी अस्पताल तथा मेडिकल कलेजमा बेथिति बढ्दै गएको गुनासो आएपछि बीमा बोर्डले पछिल्लो समय कार्यक्रम बन्द गरेको थियो । सरकारी अस्पतालले बीमा सेवा धान्न नसकेका अवस्थामा मात्रै वरपरका निजी अस्पताललाई समेट्ने रणनीति लिएको थियो ।
_1750841257.jpg)
_1750565822.gif)
_1751864738.jpg)
