झापा । प्रतिनिधिसभाका सदस्य एबम् सभामुख देवराज घिमिरेले सरकार दीगो ढंगले चल्न नसकेको जनाउँदै यस्तो अवस्थामा जनप्रतिनिधिलाई अप्ठ्यारो परिस्थितिबाट गुज्रिनु परेको बताएका छन् ।
बजेट अभावले विकास निर्माणका कामहरु हुन नसकिरहेको जनाउँदै उनले ठेक्का सम्झौंता भइसकेका सडक निर्माण गर्न सरकार लाचरी बन्नुपरेको बताए । उनले शनिश्चरे-जयपुर सडक समयमा निर्माण हुन नसकेकोमा दुःख व्यक्त गरे ।
झापा अर्जुनधारा नगरपालिकाको समग्र विकास निर्माणका बारेमा प्रतिनिधिसभाका सभामुख घिमिरेसँगको मंगलबार सप्पन्न छलफलमा उक्त कुरा बताएका हुन् ।
झापा क्षेत्र नम्बर-२ बाट निर्वाचित प्रतिनिधिसभाका सदस्य तथा सभामुख घिमिरेले छलफलका क्रममा अर्जुनधाराको विकास निर्माणका बारेमा प्राथमिकताका आधारमा योजना अघि बढेकोसमेत बताए ।
त्यस्तै, कप्तानबाडी-कालिस्थान खतिवडा चोक हुँदै निर्माण हुने वैकल्पिक सडकको निर्माण हुने कुरामा विश्वस्त हुन नसकिने पनि उनले सुनाए । संघीय सरकार र प्रदेश सरकारबाट योजनामा परेका बजेटलाई कार्यान्वयनमा लैजान आग्रह गर्दै उनले विकास निर्माणको काम गर्ने वातावरण बनाउन स्थानीयलाई आग्रह गरेका छन् ।
सभामुख घिमिरेको पहलमा यस आर्थिक वर्ष करिब ३५ करोड बराबरका ५६ वटा योजना अर्जुनधारा क्षेत्रमा परेका छन् । जसमा प्राथमिकताका आधारमा योजना पारिएको बताइएको छ ।
सभामुखको सचिवालयका अनुसार पहिलो प्राथमिकतामा खोलाको तटबन्ध निर्माण रहेको छ भने दोस्रोमा अर्जुनधारा-८ को शनिश्चरे बजारको सौन्दर्यकरणलाई प्राथमिकतामा राखिएको छ । यसैगरी, नगरमा रहेका सडक निर्माण, पर्यटन र दूध तथा मासुको प्रवर्द्धनलाई प्राथमिकतामा राखिएको सचिवालयले जनाएको छ ।
अर्जुनधारा नगरप्रमुख बलदेवसिंह गोम्देनको अध्यक्षतामा भएको छलफलमा अर्जुनधारा उद्योग वाणिज्य संघका अध्यक्ष इन्दिवर खड्काले व्यापारीका समस्या तथा झापाको पुरानो बजार शनिश्चरेलाई चलायमान बनाउन ध्यानाकार्षण गराएका थिए ।
यस्तै, शनिश्चरे बहुमुखी क्याम्पस प्रमुख मोहन ओलीले क्याम्पसलाई प्राविधिक शिक्षामा लैजान, भूमि आयोग अर्जुनधाराका फोकल पर्सन वीरबहादुर राईले नगरमा रहेका अव्यवस्थित बसोबासीको समस्या समाधान गर्न आग्रह गरेका थिए । राप्रपा अर्जुनधाराका अध्यक्ष सूर्य खतिवडा, एकीकृत समाजवादी अर्जुनधाराका अध्यक्ष अर्जुन मेचेले पनि आ-आफ्ना जिज्ञासा राखेका थिए । यसैगरी, सञ्चारकर्मी दिपिन राईले नगरमा रहेका सञ्चारमाध्यम र सञ्चारकर्मीका समस्या तथा निर्माणाधीन अर्जुनधारा प्रेस क्लबको सूचना केन्द्र भवनका बारेमा अवगत गराएका थिए ।
युवा नेतृ रोजिना पाण्डेले नगरमा बढ्दै गरेको लागूऔषध दुर्व्यसन न्यूनीकरणका लागि आवश्यक पहल गर्न ध्यानाकर्षण गराइन् । उनले बढ्दो बेरोजगार समस्या र वैदेशिक रोजगारको विकल्पको खोजी नितान्त आवश्यक रहेको सुनाइन् ।
कार्यक्रममा अर्जुनधारा ७ का तुलसी श्रेष्ठले सुकुम्बासीका समस्याका विषयमा २११ जनाले हस्ताक्षर गरेको ज्ञापनपत्र र पालिका कर्मचारी संघर्ष समिति झापाका प्रवक्ता राजु गिरीले कर्मचारीका माग सभामुखसमक्ष प्रस्तुत गरेका थिए । सभामुख घिमिरेको टोलीले अर्जुनधाराको बिर्तामोड–शनिश्चरे सडकखण्ड, शनिश्चरे–जयपुर, कालिस्थान–सेतीपानी सडकखण्ड , खुदुनाबारी बजारको अध्ययन अवलोकन गरेको थियो ।
केही समयअघि आएको बाढीले बिरिङ नदीको पुल भाच्चिएको थियो । उक्त पुल भारतीय राजदूतावासको सहयोगमा २०६४ सालमा निर्माण भएको अर्जुनधारा नगरपालिकाका प्रमुख गोम्देनले जानकारी दिए ।
सभामुख घिमिरेसंगै नगर प्रमुख गोम्देन पनि पुल अवलोकनका लागि पुगेका थिए । पुल अवरुद्ध हुँदा सो मार्ग हुँदै आवतजावत गर्नेहरुले वैकल्पिक मार्गको प्रयोग गर्नु परिरहेको छ । अस्थायी रुपमा सामान्य मर्मत गरेर पुलमा २ पांग्रे र तीन पांग्रे साना सवारी भने आवतजावत गरिरहेका छन् ।
_1750841257.jpg)
_1750565822.gif)
_1751864738.jpg)
