झापा । झापाको बिर्तामोडस्थित बीएण्डसी मेडिकल कलेज टिचिङ अस्पतालअन्तर्गतको पूर्वाञ्चल क्यान्सर अस्पतालले युरोपियन सोसाइटी फर मेडिकल अंकोलोजी (ईएसएमओ) अवार्ड प्राप्त गरेको छ । अस्पतालले क्यान्सर उपचार तथा प्रशासक सेवाको गुणस्तर र मापदण्डसम्बन्धी स्वमूल्यांकन प्रक्रिया पूरा गरेपछि सन् २०२७ देखि २०२९ सम्मका लागि उक्त मान्यता अवार्ड  प्राप्त गरेको हो । 

ईएसएमओको इन्टिग्रेटेड अंकोलोजी एन्ड प्यालिएटिभ केयर कार्यक्रमअन्तर्गत प्रदान गरिने यो मान्यता वा अवार्डले क्यान्सरका बिरामीलाई उपचारसँगै आवश्यक सहयोग, लक्षण व्यवस्थापन तथा जीवनको गुणस्तर सुधार गर्ने सेवाप्रति अस्पताल प्रतिबद्ध भएर लाग्न प्रेरित गरेको अस्पताल प्रशासनको भनाई छ ।अस्पतालले कार्यक्रमका निर्धारित सिद्धान्त र उद्देश्यप्रति आफ्नो प्रतिबद्धता प्रस्तुत गर्दै स्वमूल्यांकन आवेदन पूरा गरेको प्रमाणपत्रमा उल्लेख छ। अस्पतालका सेन्टर डाइरेक्टर अफ अंकोलोजी तथा प्यालिएटिभ केयर सेवा र अस्पतालका निर्देशकबाट विधिवत् स्वीकृत आवेदनलाई ईएसएमओको डेजिग्नेटेड सेन्टर टास्क फोर्सले समीक्षा गरेको थियो । समीक्षापछि अस्पताललाई सन् २०२७–२०२९ अवधिका लागि स्वप्रमाणित मान्यता प्रदान गरिएको प्रमाणपत्रमा उल्लेख छ । प्रमाणपत्रमा ईएसएमओ डेजिग्नेटेड सेन्टर टास्क फोर्सकी अध्यक्ष जेयन वुडको नाम उल्लेख गरिएको छ । पूर्वाञ्चल क्यान्सर अस्पतालले प्राप्त गरेको यो मान्यताले नेपालमा क्यान्सर उपचार तथा प्रशामक सेवाको विकास, सेवा प्रणालीको सुधार र बिरामीकेन्द्रित उपचार पद्धतिलाई थप प्रोत्साहन गर्ने अपेक्षा गर्न सकिन्छ ।क्यान्सर उपचारमा औषधि तथा अन्य चिकित्सकीय सेवासँगै बिरामीको पीडा कम गर्ने, मानसिक तथा सामाजिक सहयोग उपलब्ध गराउने र जीवनको गुणस्तर कायम राख्ने प्रशामक सेवा पनि महत्त्वपूर्ण मानिएको अस्पतालका जनसम्पर्क प्रमुख  प्रमिश गिरीले जानकारी दिए ।